Ann an 1603, chaochail bànrigh Shasainn gun sliochd, agus chaidh crùn Shasainn gu rìgh Stiùbhartach nan Albannach, Seumas VI. Cha d' fhuair duine de shliochd Sheumais cothrom riaghladh ann an sìth, agus fad lìnn, thionndaidh iad chun nam fìneachan Gàidhealach airson cuideachadh fhaighinn. Thugadh 'Seumasaich' air na thug taic dhaibh. Thug iad buaidh mhòr as leth a' chiad rìgh Teàrlach aig blàr Inbhir Lò…showed first 75 words of 439 total…

…showed last 75 words of 439 total…na h-Alba an Gleann Fhionghain agus an Cùil Lodair agus chaidh seirbheis cuimhneachaidh Ghàidhlig a cumail air Dimàirt 16 Giblean 1996 aig an làrach. Tha mòran chuimhneachan Sheumasach inntinneach ann an Taigh-tasgaidh a' Ghearasdain, agus tha càrn a' comharrachadh an àite aig Loch nan Uamh bhon d'fhàg am Prionnsa Teàrlach Alba gu bràth, le geur-leanmhainn is casgairt eagalach ga dhèanamh air an fheadhainn a thug taic dha.